बुढ्यौली !

बन्छन् दुबै नयन यी कमजोर यन्त्र
आएर दृश्य पर भाग्छ बनी स्वतन्त्र ।
रोकेर रोक्न सकियोस् न त त्यो बुढ्यौली
भित्रिन्छ जो वयसँगै सबको बुढ्यौली ॥१।

सुन्नै छ मुस्किल बडो जब शब्द पर्छन्‌
श्रोता थिए अब त कर्ण वृथा ठहर्छन् ।
भन्दै छ यौवन उता बस है बुढ्यौली
भित्रिन्छ आखिर उमेरसँगै बुढ्यौली ॥ २।

यी दन्तका लहर छन् हिमशैल जस्ता
देखिन्छ पत्थर समान झरी विरक्त ।
पर्खेर स्वागत गरौँ अबको बुढ्यौली
भित्रिन्छ त्यो वयसँगै सबको बुढ्यौली ॥३।

बग्नेछ र्‍याल मुखबाट झरेर तप्प
बल्नेछ तेल सकिँदाकन दीप धिप्प ।
चढ्ला भन्यो प्रगतिले नचढी उँभौली
भित्रिन्छ त्यो वयसँगै सबको बुढ्यौली ॥४।

लोहा समान बलवान् नत होस् बलिष्ठ
बन्नेछ देह कमजोर सहन्छ कष्ट ।
लागे सरी हरिण जीवनमा उँधौली
भित्रिन्छ त्यो वयसँगै सबको बुढ्यौली ॥५।

यस्ता विचार मनभित्र हजार आए
छैनस् बुढो अति जवान तँ छस् भनाए
जाग्यो ममा रहर यौवन फर्किएझैँ
जो वृद्धको लयदिने वय बिर्सिएँझैं ॥६।
(छन्द : वसन्ततिलका)
लिखु – ६, थानसिङ्ग, नुवाकोट।