मेरो बुबा

हुन त बुबा शब्द
सुन्दैमा आफैमा
गर्भिलो महसुस हुने गर्छ ।
आमा प्रसव
वेदनाले रुँदै गर्दा
बुबा पीडामा कसैले
नदेख्ने गरी आफ्नो
नुनिलो आँसु निलिदिन्छन्‌
मान्छेहरूले भन्ने गर्छन्‌
छोरा मान्छे रुदैनन्‌
तर मैले धेरै पटक
मेरो बुबा रोएको देखेको छु ।
उनको आँसु लुकाएर रुने
अनुहार देखेको छु
मेरो बुवा जहिले
मेरो दुःखमा आँत्तेको देखेको छु
मेरो बुबा महानताको
प्रतीक लाग्छ
ती फुटेका कुर्कुच्चा
त्यो भोको पेट
एकसरो आँङ ढाक्न
तिमीले कहिल्लै
रहर गरेको मैले देखिन ।
छोरी छोरी भए भनी
छोराको चाहनामा
मलाई कहिल्लै
रुखो वचन बोलेको सुनिन बुबा ।
सधैंभरि मेरो सुखको लागि
आफ्नो बलिदानी दिइराख्ने
मेरो बुबा
आफ्नो सम्पूर्ण जीन्दगी
दाउमा राखेर सन्तानको
सुख मात्रै खोजिरह्यौ
यो उमेरसम्म हिम्मत राखिराख्यौ
अब मेरो पालो हो बुबा
हामी सन्तानको पालो हो
तिमीले सुख पाएको हेर्ने
तिमी हाँसेको हेर्ने
तीब्र इच्छा पूरा हुन देऊ बुबा
आफ्ना सम्पूर्ण पीडा सारिदेऊ बुबा
म सधैं तिमीसँगै हुन चाहन्छु
तिम्री छोरी हुनुको
कर्तव्य पूरा गर्न चाहन्छु
सधैंभरि बुबा भन्न चाहन्छु
तिम्रै छोरी बन्न चाहन्छु ।

टोखा–१०, गोङ्गबुँ, काठमाडौं।