शिवपुरी महाउत्पादनको नयाँ बिक्रीकक्षको शुभारम्भ

नुवाकोट (शिवपुरी, थापागाउँ), २०८१ चैत्र १८ गते । नुवाकोट महाउत्पादन डेरी उद्योग, शिवपुरी–८, थानापती, नुवाकोटले छहरे–टोखा राजमार्गको शिवपुरी–८, थापागाउँमा ‘शिवपुरी एकीकृत एग्री मार्ट एण्ड खाजाघर’ को शुभारम्भ गरेको छ ।

शिवपुरी महाउत्पादन डेरी उद्योगका अध्यक्ष रामप्रसाद पुडासैनीको सभापतित्व र शिवपुरी गाउँपालिकाका अध्यक्ष गोविन्द थपलियाको प्रमुख आतिथ्यमा कार्यक्रम सञ्चालन भएको थियो । कार्यक्रमका अन्य अतिथिहरूमा गाउँपालिकाका उपाध्यक्ष वीरबहादुर तामाङ, गाउँपालिकाका वडा नम्बर ८ का अध्यक्ष केशवप्रसाद रिजाल, कार्डसनका अध्यक्ष पदम उप्रेती, वडा नम्बर ८ का पूर्वअध्यक्ष पदम थपलिया, बुद्धिजीवी, साहित्यकार, पत्रकार, विभिन्न राजनीतिक दलका स्थानीय प्रतिनिधि, शिक्षक, विद्यार्थी, कलाकार तथा महिला दिदीबहिनीहरूको उपस्थिति रहेको थियो । त्यसको साथै शुभारम्भ कार्यक्रममा नुवाकोट महाउत्पादन डेरी उद्योगको काठमाडौं, सामाकोशी बिक्रीकक्षबाट पनि दर्जनौ उपभोक्ताहरूको सहभागिता रहेको थियो ।

कायक्रमलाई सम्बोधन गर्दै गाउँपालिकाका अध्यक्ष गोविन्द थपलियाले गाउँ गाउँमा स्थापना हुने यस्ता कृषिजन्य उद्योग र बजारीकरणको विस्तारले युवाहरूलाई विदेश जानबाट केहीहदसम्म भए पनि रोक्ने र कृषिमा आधुनिकीकरण भई आर्थिक आयसमेत बढ्न जाने बताउनुभयो । गाउँपालिकाका उपाध्यक्ष वीरबहादुर तामाङले युवा जनशक्तिले सञ्चालन गर्ने हरेक किसिमका आयआर्जनका उद्योग, व्यवसाय र कार्यक्रमहरूलाई सहयोग, प्रोत्साहन र पुरस्कृत गरिने कुरा बताउनुभयो । डेरी उद्योगका अध्यक्ष रामप्रसाद पुडासैनीले नुवाकोट महाउत्पादन डेरी उद्योग, तथा ‘शिवपुरी एकीकृत एग्री मार्ट एण्ड खाजाघर’ को स्थापना र सञ्चालनको महत्त्व र उद्देश्य बारे प्रकाश पार्नुभएको थियो ।

महाउत्पादनले ‘थानापति नमुना व्यावसायिक कृषि उद्योग’, र ‘शुभलक्ष्मी कृषि तथा पशुपालन फर्म’ सञ्चालन गर्दै आएकोमा अबबाट भने ‘शिवपुरी एकीकृत एग्री मार्ट एण्ड खाजाघर’ को पनि शुभारम्भ र सञ्चालन थालेको छ । नमुना व्यावसायिक कृषि उद्योगमा ३५ वटा गाई, भैँसी रहेका छन् भने शुभलक्ष्मी कृषि फर्मअन्तरगत ७० रोपनी बढी क्षेत्रफल रहेको शिवपुरी–८, थापागाउँका दुई स्थानबाट तरकारी तथा फलफूलहरू उत्पादन गर्दै आएको छ । शिवपुरी एकीकृत एग्री मार्ट एण्ड खाजाघरमा डेरी तथा कृषिजन्य स्थानीय उत्पादनमा आधारित विभिन्न परिकार, खाजा, खानाको साथमा सभा, गोष्ठी र कार्यक्रमहरूको लागि सुविधा सम्पन्न सेवा र स्थान उपलब्ध गराइने पनि जनाइएको छ ।

अध्यक्ष रामप्रसाद पुडासैनीसमेत ९ जना (प्रकाश पाण्डे, रामचन्द्र पाठक, विमल पाण्डे, सुजन अधिकारी, जनक पुडासैनी, विक्रम पुडासैनी, विष्णु अधिकारी र नवराज थापा) सञ्चालक रहेको महाउत्पादनमा साढे ६ करोड बढी लगानी भइसकेको कुरा अध्यक्ष पुडासैनीले बताउनुभयो । हाल नमुना कृषि उद्योगमा ३ जना, शुभलक्ष्मी कृषि फर्ममा ५ जना, डेरी उद्योगमा १३ जना कर्मचारीहरू रहेकोमा नयाँ शुभारम्भ भएको एकीकृत एग्री मार्ट एण्ड खाजाघरमा ७ जना नियुक्त भएको पनि अध्यक्षले जानकारी दिनुभयो ।

त्यस अवसरमा महाउत्पादनले दूध, दही, मोही, नौनी, घिउ, पनिर, पाउडर दूध र मिठाइका विभिन्न प्रकारहरू उत्पादन गर्ने, कृषकले ल्याउने गाई, भैँसीको दूध सङ्कलन गर्ने, आफ्नै फर्मबाट तरकारी, फलफूल उत्पादन गर्ने तथा कृषकका तरकारी, फलफूलजस्ता कृषिजन्य उत्पादनको समेत खरिद बिक्री गर्ने कार्य गर्दै आइहेको पनि जानकारी दिइएको थियो ।